Waziri Ummy: Kuna tishio la Ebola kuingia Tanzania
Share
Tweet
Copy Link
- Serikali yasema mikoa 5 ikiwemo Mwanza na Kagera iko hatarini zaidi kupata ugonjwa huo.
- Mpaka sasa hakuna hata mgonjwa mmoja aliyegundulika.
- Wananchi watakiwa kuchukua tahadhari, Serikali ikiendelea kuchukua hatua za kudhibiti ugonjwa huo usiingie nchini.
Dar es Salaam. Baada ya ugonjwa wa Ebola kuishambulia Uganda, Waziri wa Afya Ummy Mwalimu amesema wananchi wachukue tahadhari kwa sababu kwa sasa kuna tishio la ugonjwa huo kuingia Tanzania.
Ummy aliyekuwa akizungumza na waandishi wa habari leo Septemba 28, 2022 jijini Dodoma amesema ugonjwa huo ni tishio ukizingatia ukaribu uliopo kati ya Uganda na Tanzania.
“Kwa hiyo tumeona kutoka Mubende (Uganda) hadi kufika mpakani kwetu Mtukula mkoani Kagera kupitia Masaka ni takribani kilometa 230 kwa hiyo mtaona siyo mbali,” amesema Waziri.
Hata hivyo, mpaka sasa hakuna mgonjwa hata mmoja aliyegundulika kupata maambukizi ya ugonjwa huo nchini.
Ugonjwa huo ni miongoni mwa magonjwa yanayosambaa kutoka kwa wanyama kwenda kwa binadamu kwa kula au kugusa mnyama mwenye maambukizi kama nyani, kima, popo na swala.
“Ugonjwa wa Ebola unaenea kutoka kwa binadamu mmoja kwenda kwa mwingine kwa kugusa majimaji ya mwili wa mgonjwa kwa mfano mate, machozi, damu, matapishi, mkojo na kinyesi. Endapo mtu ataona dalili hizi awahi kituo cha kutolea huduma za afya,” amesisitiza Waziri Ummy.
Kwa mujibu wa Wizara ya Afya Uganda, hadi kufikia Septemba 25 mwaka huu watu 36 walikuwa wameugua ugonjwa huo ambapo 23 kati yao wamefariki dunia.
Zinazohusiana:
- Fanya haya kuboresha ulaji wa chakula
- Jinsi unavyoweza kuishinda sonona isiharibu maisha binafsi, kazi.
- Mambo yatakayokusaidia kupunguza hatari ya kupata saratani.
Mikoa iliyo katika hatari zaidi
Waziri Ummy ameitaja mikoa mitano ambayo iko katika hatari zaidi ya kupata ugonjwa huo kuwa ni Kagera, Mwanza, Kigoma, Geita na Mara
Mikoa iliyo katika hatari ya kati ni pamoja na Dar es Salaam, Kilimanjaro, Songwe, Dodoma na Arusha kutokana kuwa na viwanja vya ndege ambavyo vinapokea wageni wa kimataifa.
Serikali inachukua hatua gani?
Kufutia mlipuko wa ugonjwa huo nchini Uganda, Serikali ya Tanzania imejipanga kufanya taratibu mbalimbali kuhakikisha ugonjwa huu hauingii nchini ikiwemo kutoa elimu, kutoa vifaa tiba na dawa za kutosha.
Serikali pia imeandaaa dawa na vifaa tiba muhimu vinavyotakiwa kuwepo kwenye vituo vya afya hususani kwenye mikoa iliyopo hatarini zaidi ikiwemo mkoa wa Kagera.
“Tunahakikisha kwamba endapo watapata mgonjwa basi wanafanya kazi zao za kutoa huduma ambayo ni salama kwao na kwa mgonjwa,“ amesema Ummy.
Pia Serikali itaimarisha uchunguzi kwenye mipaka yenye muingiliano mkubwa na nchi zenye maambukizi ya ugonjwa huo.
“Kuimarisha ufuatiliaji wa tetesi za watu wenye viashiria vya ugonjwa kwenye jamii na vituo vya kutolea huduma na kuwahudumia wagonjwa watakao thibitika, kuimarisha mfumo wa usafirishaji wa sampuli kwa ajili ya kufikisha maabara ya Taifa,” amesema Ummy.
Aidha, Waziri huyo amewataka wananchi kuchukua tahadhari kuhakikisha ugonjwa huu hauingii nchini Tanzania .
“Mimi bado naaamini kabisa Watanzania tuna uwezo wa kuhakikisha ugonjwa huu hauingii nchi,” amesema Waziri Ummy.
