Rais Samia amlilia Lawrence Mafuru
Share
Tweet
Copy Link
- Ni baada ya kufariki Novemba 9, 2024 akipatiwa matibabu nchini India.
Arusha. Rais wa Tanzania Samia Suluhu Hassan amesema amepokea kwa masikitiko makubwa taarifa ya kifo cha aliyekuwa Katibu Mtendaji wa Tume ya Mipango, Lawrence Nyasebwa Mafuru aliyefariki leo Novemba 9, 2024.
Taarifa ya Ikulu Mawasiliano inabanisha kuwa Mafuru amefariki leo Novemba 9, 2024 katika Hospitali ya Apollo nchini India alipokuwa akipatiwa matibabu.
Kupitia taarifa yake iliyochapishwa kwenye mitandao ya kijami Rais Samia ametoa pole kwa watumishi wa Tume ya Mipango, ndugu, jamaa na marafiki.
“Ninatoa pole kwa familia, Waziri wa Nchi, Ofisi ya Rais (Mipango na Uwekezaji) Mheshimiwa Prof. Kitila Alexander Mkumbo, watumishi wa Tume ya Mipango, ndugu jamaa na marafiki kufuatia msiba huu…
…Mafuru atakumbukwa kwa utumishi wake uliotukuka, bidii na ubunifu alipotumikia nafasi mbalimbali ndani ya Serikali,” amesema Rais Samia katika mitandao yake ya kijamiai ikiwemo Instagram.
Enzi za uhai wake Mafuru alitumikia nafasi mbalimbali katika Serikali za awamu tofauti ikiwemo ya Rais Samia kama Naibu Katibu Mtendaji wa Tume ya Mipango ya Taifa nafasi aliyoitumikia tangu Julai 5, 2023 tume hiyo ilipoundwa.
Kabla ya kuitumikia nafasi hiyo Mafuru alikuwa Naibu Katibu Mkuu, Wizara ya Fedha na Mipango (Usimamizi wa Uchumi).
Pia aliwahi Mkurugenzi wa Benki ya Taifa ya Biashara (NBC), Msajili wa Hazina na Katibu Mtendaji wa Baraza la Taifa la Uwezeshaji Wananchi Kiuchumi katika Serikali ya awamu ya nne ya Rais Jakaya Mrisho Kikwete.
