---

• Benki ya CRDB imenunua Dola ya Marekani kwa Sh2,585 na kuiuza kwa Sh2,665.
• Sarafu nyingine zilizoongezeka ni pamoja na Yuan ya China (CNY) na Shilingi ya Uganda (UGX).

Dar es Salaam. Dola ya Marekani yaongezeka kwa Sh5 dhidi ya Shilingi ya Tanzania Mei 25, 2026, huku viwango vipya vya ubadilishaji fedha vikionyesha kupanda kwa baadhi ya sarafu kuu za kimataifa ikilinganishwa na wiki iliyopita.

Kwa takribani wiki nzima iliyopita Dola ya Marekani imekuwa ikiongezeka kwa Sh5 jambo ambalo linaweza kuwapa maumivu wafanyabiashara na watumiaji wa sarafu za kigeni.

Uchambuzi wa viwango vya kubadili fedha kutoka benki za CRDB na NMB unaonyesha kuwa Dola ya Marekani (USD), Euro (EUR) na Pauni ya Uingereza (GBP) zimeendelea kuimarika dhidi ya Shilingi ya Tanzania.

Katika viwango vya leo, Benki ya CRDB imenunua Dola ya Marekani kwa Sh2,585 na kuiuza kwa Sh2,665 kutoka Sh2,580 na Sh2,660 za Mei 22, 2026, ikiwa ni ongezeko la Sh5 kwa kununua na kuuza. 

Kwa upande wa NMB, dola imeendelea kununuliwa kwa Sh2,583 na kuuzwa kwa Sh2,663 bila mabadiliko yoyote.

Euro nayo imeonyesha kupanda kwa thamani ambapo CRDB imenunua kwa Sh2,883.74 na kuuza kwa Sh3,183.74 kutoka Sh2,879.27 na Sh3,179.24 za wiki iliyopita, ikiwa ni ongezeko la zaidi ya Sh4.

 Kwa upande wa NMB, Euro imenunuliwa kwa Sh2,903 sawa na wiki iliyopita huku kiwango cha kuuza kikiongezeka kutoka Sh3,176 hadi Sh3,177.

Pauni ya Uingereza imeendelea kuonyesha ongezeko kubwa zaidi katika sarafu kuu zilizofuatiliwa. CRDB imenunua Pauni kwa Sh3,361.12 na kuuza kwa Sh3,661.12 kutoka Sh3,354.37 na Sh3,654.37 za wiki iliyopita, sawa na ongezeko la Sh6.75 kwa pande zote mbili.

 NMB nayo imenunua Pauni kwa Sh3,329 na kuuza kwa Sh3,675 kutoka Sh3,323 na Sh3,668 za Mei 22, 2026.

Sarafu nyingine zilizoongezeka ni pamoja na Yuan ya China (CNY) na Shilingi ya Uganda (UGX), huku viwango vya Rand ya Afrika Kusini na Rupia ya India vikionyesha mabadiliko madogo.

Kwa ujumla, mwenendo wa leo unaonyesha kuwa soko la fedha za kigeni nchini linaendelea kuwa tulivu licha ya kupanda kwa baadhi ya sarafu muhimu duniani.

Hali hii inaendelea kuwa muhimu kwa wafanyabiashara, wawekezaji na wasafiri wanaotegemea fedha za kigeni katika shughuli zao za kila siku, ikiwemo uagizaji wa bidhaa kutoka nje ya nchi, malipo ya huduma za kimataifa pamoja na majukumu mengine ya kifedha.