Soko la Masumbwe: Kivutio cha utalii kwa wafanyabiashara Kanda ya Ziwa

June 18, 2021 9:18 am · Mwandishi

Copy Link

Lilianzishwa mwaka 1952 na ni maarufu kwa minada ya bidhaa.
Ni kiungo cha biashara katika mikoa ya Geita, Tabora, Kagera, Mwanza na Shinyanga.
Ni soko la asili lililopo kwenye uwanja wa wazi likiwa na vibanda vya nyasi.

Geita. Kutembelea maeneo mbalimbali usiyoyajua ama kufika iwe ndani au nje ya nchi ni moja ya shughuli ya utalii ambayo itakufungua macho kufahamu usiyoyajua kuhusu eneo husika.

Hivi karibuni, baadhi ya waandishi wa habari wa Nukta Habari (www.nukta.co.tz) walitembelea Wilaya ya Mbogwe mkoani Geita kwa shughuli maalum.

Katika matembezi yao katika wilaya hiyo iliyofunikwa kwa milima na mabonde yenye misitu na hali ya ubaridi kiasi walifanikiwa kutembelea soko la Masumbe ambalo ni maarufu kwa uuzaji wa bidhaa mbalimbali ikiwemo mifugo.

Bidhaa nyingine ambazo zinauzwa na wakazi na wageni katika soko hilo liko kwenye uwanja wa wazi ni mazao, bidhaa za nyumbani, mavazi na vifaa mbalimbali vinavyotumika katika shughuli za uzalishaji.

Soko hilo la asili ambalo vibanda vyake vimeezekwa kwa majani lilianzishwa mwaka 1952 limekuwa kiungo muhimu cha biashara katika mikoa ya Geita, Tabora, Kagera, Mwanza na Shinyanga.

Wakulima na wafugaji kutoka maeneo mbalimbali ndani na nje ya Wilaya hiyo wamekuwa wakileta bidhaa katika soko hilo huku siku muhimu ikiwa ni siku ya Jumatano ambayo ni maalum kwa mnada.

Siku hiyo watu hufurika ili kujipatia mahitaji mbalimbali. Hizi ni baadhi ya picha ambazo zinaonyesha mandhari ya soko hilo ambalo linaweza kukuvutia kutembelea siku zijazo:

Wakati wa asubuhi wafanyabiashara wa soko hilo hujiweka tayari kwa kupanga bidhaa zao sokoni hapo. Picha| Gift Mijoe.