Maoni mchanganyiko matumizi fedha za Tasaf Mwanza
Share
Tweet
Copy Link
- Baadhi ya wanufaika wa mfuko huo hawazitumii kwa malengo yaliyokusudiwa.
- Ukubwa wa familia na umri mkubwa wachangia hali hiyo.
- Wengine wanazitumia katika shuguli za kilimo kuongeza kipato.
Mwanza. Licha ya Serikali kutumia mamilioni ya fedha kukabiliana na tatizo la umasikini nchini kupitia Mpango wa Taifa wa Kusaidia Kaya Masikini (Tasaf), baadhi ya fedha hizo zimekua hazitumiki kwa malengo yaliyokusudiwa kutokana na wanufaika kushindwa kuzitumia katika shughuli za uzalishaji mali.
Changamoto hiyo inatokana na wanufaika kuwa wenye umri mkubwa, huku baadhi yao wakisumbuliwa na magonjwa mbalimbali pamoja na wingi wa watoto kwenye familia. Inawakumba baadhi ya wanufaika wa Tasaf katika Mkoa wa Mwanza, jambo ambalo linawafanya waendelea kuogelea kwenye umasikini.
John Mashimba ni mmoja wa wanufaika kutoka mtaa wa National Jijini Mwanza, anaelezea kiasi cha fedha anachopokea hakiwezi kumsaidia kuongeza kipato kutokana na idadi kubwa ya familia inayomtegemea.
“Ninajumla ya watoto saba, wote ni wanafunzi na wananitegemea, kiasi cha Sh40,000 ninachopokea hakitoshelezi kukidhi mahitaji na kuanzisha biashara nyingine,” anasema Mashimba.
Soma zaidi:
- Siku ya Kutokomeza Umasikini Duniani ilivyogeuzwa kuwa Siku ya VICOBA Tanzania
- Umaskini wa kaya Tanzania washuka-Ripoti
Wakati baadhi ya wanufaika wakilalamika, wengine wanajiongeza kwa kuwekeza fedha hizo katika miradi yenye tija kiuchumi.
Mnufaika mwingine Kija Saanane pamoja na kuwa na familia ya watoto tisa wanaomtegemea anarudisha fadhila kwa Tasaf baada ya ruzuku anayopata kuigawa sehemu mbili.
“Napokea kiasi cha Sh60,000 naigawa katikati nyingine natumia kwenye shughuli za uzalishaji mali,” anasema Saanane.
Saanane ambaye ni mjane anasema fedha hizo huzitumia kununulia mbolea kwa ajili ya kilimo cha bustani na mboga mboga, kufugia kuku na mpaka sasa amefanikiwa kujenga nyumba.
Mkurugenzi wa Mawasiliano wa Tasaf, Zuhura Mdungi amesema wanufaika hao bado wana nafasi ya kutumia fursa hiyo kujikwamua kiuchumi.
Mdungi amesema mbali na kutegemea fedha hizo, pia wana wajibu wa kujiunga kwenye vikundi vya kijamii vya kukopeshana ili waweze kujiongezea kipato.
