• Asema kuna mapungufu katika ushahidi, sheria na hati ya mashtaka
• Kesi itaendelea tena kesho Septemba 25, 2026.

---

Dar es Salaam. Kesi ya uhaini inayomkabili Mwenyekiti wa Chama cha Demokrasia na Maendeleo (CHADEMA), Tundu Lissu, imeendelea leo Septemba 24, 2026, huku akiendelea kuwasilisha hoja zake za mwisho ili kuishawishi mahakama kuwa hana hatia.

Lissu anayeshtakiwa kwa kosa la uhaini kinyume na Sheria ya Kanuni ya Adhabu iliyofanyiwa marekebisho mwaka 2023 linalotokana na tuhuma za matamshi aliyoyatoa Aprili 3, 2025 jijini Dar es Salaam ya kutoshiriki na kuzuia Uchaguzi Mkuu 2025 ametumia saa tisa kuilezea mahakama kuwa hana hatia kwa mujibu wa sheria.

“Haya matendo ambayo nimeshitakiwa nayo, hayakai sehemu ya matendo kumi yaliyotajwa kuwa ni makosa ya uhaini, maana yake ni kwamba mimi sijafanya kosa lolote la uhaini.

Kama sijafanya kosa la uhaini, je nimefanya kosa lingine lolote kwa mujibu wa Sheria ya Tanzania?,” amehoji Lissu mbele ya majaji watatu wa Mahakama Kuu ya Tanzania, Masjala ndogo ya Dar es Salaam wanaoendesha kesi hiyo.

Mapungufu katika ushahidi

Katika hoja zake leo Lissu amebainisha mapungufu katika ushahidi uliotolewa na mashahidi watatu upande wa mashtaka.

Mashahidi hao ni PW1, PW2 na PW16 ambao wote ni askari polisi waliotoa ushahidi wao mwishoni mwa mwezi Agosti, 2026 akidai kuwa ushahidi wao unafanana hivyo hauna mashiko na una mikanganyiko na kwamba wote hawajathibitisha yeye kuitisha mkutano na kusema maneno yanayodaiwa kuwa uhaini.

Maneno pekee hayawezi kuwa “tendo” la uhaini

Hoja nyingine ya Lissu imepinga tafsiri ya upande wa mashtaka kwamba maneno aliyoyasema yanaweza kuchukuliwa kama “overt act” (tendo la bayana) katika kosa la uhaini.

Amesema sheria inahitaji kuwepo kwa kitendo bayana kinachoonyesha nia, hivyo maneno yaliyosemwa hayawezi kubadilishwa kuwa tendo kwa tafsiri ya upande wa mashtaka.

Kiongozi huyo wa upinzani pia amehoji matumizi ya neno “altering” katika hati ya mashtaka, akisema katika Sheria ya Kanuni ya Adhabu (Penal Code, Cap. 16) neno hilo linahusishwa na makosa kama forgery (kughushi nyaraka) na kubadilisha nyaraka, si kitendo cha kubadilisha au kutamka maneno kama kinavyoelezwa katika shtaka dhidi yake.

Dosari katika hati ya mashaka
Kwa mujibu wa Lissu, hati ya mashtaka imetumia maneno ambayo kwa mtazamo wake hayana msingi katika kifungu cha sheria anachotuhumiwa kukikiuka, hivyo shtaka hilo ni lenye kasoro isiyoweza kurekebishika na haliwezi kutibika.

“Hati ya mashtaka ni batili…imetaja kitu ambacho hakipo kwenye sheria.” amesisitiza Lissu.

Kutokana na ufinyu wa muda Mahakama imeamuru Lissu kuendelea kufanya majumuishi ya hoja zake kesho Septemba 25, 2026 saa tatu asubuhi.