Dola ya Marekani yaimarika kwa 0.5% ndani ya mwezi mmoja
Share
Tweet
Copy Link
- Ni katika kipindi cha kuanzia mwanzoni mwa mwezi Mei
Dar es Salaam. Dola ya Marekani imeendelea kuimarika dhidi ya Shilingi ya Tanzania, ikiongeza thamani kwa Sh15 katika kipindi cha takribani mwezi mmoja tangu mwanzo wa Mei hadi Juni 1, 2026, katika benki za CRDB na NMB.
Kwa mujibu wa takwimu za viwango vya kubadilisha fedha, Dola ya Marekani inauzwa kwa Sh2,665 na kununuliwa kwa Sh2,585 katika benki hizo mbili leo Juni 1, 2026, ikilinganishwa na Sh2,650 ya kuuza na Sh2,570 ya kununua zilizokuwa zikitumika Mei 4, 2026.
Ongezeko hilo ni sawa na asilimia 0.57 kwa bei ya kuuza na asilimia 0.58 kwa bei ya kununua, likionyesha kuimarika kwa sarafu hiyo ya Marekani dhidi ya Shilingi ya Tanzania ndani ya mwezi mmoja.
Kuimarika kwa dola kunaweza kuongeza gharama za uagizaji wa bidhaa kutoka nje ya nchi, hususan mafuta, mitambo na malighafi zinazolipiwa kwa dola, jambo ambalo linaweza kuongeza shinikizo la gharama kwa wafanyabiashara na watumiaji.
Mbali na dola, sarafu nyingine kubwa za kimataifa pia zimeonyesha kuimarika katika kipindi hicho. Euro imeongezeka thamani katika benki zote mbili, ambapo bei ya kuuza NMB imepanda kutoka Sh3,188 hadi Sh3,192 huku bei ya kununua ikiongezeka kutoka Sh2,913 hadi Sh2,918.
Yuani ya China pia imeonyesha ongezeko, ambapo katika NMB bei ya kuuza imepanda kutoka Sh414 hadi Sh418 na bei ya kununua kutoka Sh375 hadi Sh379.Â
Hali kama hiyo imeonekana kwa Rand ya Afrika Kusini, ambayo imepanda kutoka Sh173 hadi Sh180 kwa bei ya kuuza na kutoka Sh153 hadi Sh160 kwa bei ya kununua katika NMB.
Kwa upande wa sarafu za kikanda, Shilingi ya Kenya imeimarika kidogo. Katika NMB, bei ya kununua imeongezeka kutoka Sh17.6 hadi Sh17.7 huku bei ya kuuza ikipanda kutoka Sh22.2 hadi Sh22.3.
Hata hivyo, baadhi ya sarafu zimeonyesha mabadiliko madogo au kubaki karibu na viwango vya awali, hali inayoashiria kuwa soko la fedha za kigeni limeendelea kuwa tulivu licha ya kuimarika kwa dola na baadhi ya sarafu kuu za kimataifa.
