• Yatoa wito kwa wawekezaji kuelekeza miradi yao katika sekta zenye uwezo wa kukuza uchumi na kuongeza mauzo nje ya nchi.

Dar es Salaam. Serikali imesisitiza kuwa mwelekeo mpya wa uwekezaji nchini unatakiwa kulenga kutatua changamoto za kiuchumi zinazowakabili Watanzania hasa vijana, kwa kuwafungulia fursa za ajira na kuchochea ukuaji wa uchumi.

Waziri wa Nchi, Ofisi ya Rais Mipango na Uwekezaji, Prof Kitila Mkumbo aliyekuwa akizungumza leo Novemba 28, 2025 jijini Dar es Salaam katika uzinduzi wa Bodi ya Wakurugenzi na Watoa Huduma wa Mamlaka ya Uwekezaji na Maeneo Maalumu ya Kiuchumi Tanzania (Tiseza), amesema Serikali inataka aina ya uwekezaji unaojibu mahitaji halisi ya wananchi.

“Nataka niwapeni maelekezo maalumu yanayolenga kuwapa mikakati itakayochochea uwekezaji unaojibu shida za kiuchumi za Watanzania, hususan fursa za ajira kwa vijana,” amesema Prof. Mkumbo.

Prof Mkumbo, ameeleza kuwa katika kuimarisha mazingira ya uwekezaji, wahusika wanapaswa kuhakikisha shughuli zote za uwekezaji zinaendana na vipaumbele vilivyobainishwa kwenye Dira ya Taifa ya Maendeleo 2050, ikiwemo kuimarisha ajira, kuongeza uzalishaji, na kukuza uchumi shindani.

Aidha, Prof Mkumbo ameeleza umuhimu wa uwekezaji unaoonekana katika maisha ya wananchi wa kawaida, akionya dhidi ya uwekezaji wa kwenye televisheni ambao hauonyeshi matokeo kwa wananchi.

“Uwekezaji usiojibu shida za Watanzania hauwezi kutusaidia. Tunataka uwekezaji ambao vijana wakisoma takwimu wajione humo, mama lishe ajione humo, boda boda ajione humo. Hatuwezi kuzungumzia uwekezaji wakati wananchi bado hawana ajira,” amesema Prof Mkumbo.

Tiseza ni muunganiko wa Taasisi ya Uwekezaji Tanzania (TIC) na Mamlaka ya Ukanda Maalumu wa Uwekezaji (EPZA) ilioanzishwa mwaka huu lengo likiwa ni kuboresha mazingira ya biashara na uwekezaji kutoka ndani na nje ya nchi na kuchochea ukuaji wa uchumi.

Kupitia bodi mpya, Prof Mkumbo amesema Serikali ina imani kuwa taasisi hiyo itaboresha uratibu wa shughuli za uwekezaji na kuongeza ushindani wa Tanzania katika kuvutia wawekezaji.

View this post on Instagram

Prof Mkumbo amefafanua kuwa bodi ya Tiseza imepewa jukumu la kuhakikisha vigezo hivyo vinatumika katika kupendekeza maeneo ya uwekezaji na vivutio vinavyostahili kutolewa kwa wawekezaji.

Sanjari na hayo pia amesema Dira ya Taifa ya Maendeleo 2050 imebainisha vigezo vitano muhimu vya kuchagua sekta za kimageuzi ambavyo bodi inapaswa kuzingatia, vikiwemo uwezo wa sekta kuzalisha ajira nyingi hasa kwa vijana na  uwezo wa kuongeza mauzo ya bidhaa nje ya nchi (export potential).

Vile vile, nafasi ya sekta kuchochea ukuaji wa sekta nyingine, uwezo wa kuongeza thamani ya bidhaa (value addition), na mchango wa sekta katika kuongeza mapato ya Serikali.

Hata hivyo, Prof Mkumbo ameongeza kuwa serikali itaendelea kuboresha mazingira rafiki ya uwekezaji, akitoa wito kwa Tiseza kushirikiana kwa karibu na Serikali na wadau wa sekta binafsi ili kuhakikisha Tanzania inabaki kuwa kivutio kikubwa cha uwekezaji barani Afrika.