Ukatili mtandaoni wapungua 55%, wanaume hatarini zaidi
Share
Tweet
Copy Link
- Kati ya matukio yote 213 yaliyorekodiwa, wanaume walikuwa wahanga katika matukio 161, sawa na asilimia 75.6, huku wanawake wakiwa wahanga katika matukio 52, sawa na asilimia 24.4.
Dar es Salaam. Mitandao imekuwa sehemu muhimu ya maisha ya waliowengi ikiwawezesha kuwasiliana, kufanya biashara au kuifurahisha.
Pamoja na manufaa hayo, matumizi ya mitandao pia yamekuwa yakihusishwa na changamoto mbalimbali za usalama na ustawi wa watumiaji, ikiwemo ukatili mtandaoni (cyberbullying) unaoathiri makundi mbalimbali ya watumiaji.
Ripoti ya Hali ya Uhalifu na Matukio ya Usalama Barabarani inayotolewa na Jeshi la Polisi Tanzania inabainisha kuwa mwaka 2025 kulikuwa na matukio 213 ya ukatili mtandaoni.
Kwa mujibu wa ripoti hiyo, matukio hayo yayohusisha vitendo kama vile kutoa taarifa za uongo, lugha ya matusi, udanganyifu unahusiana na komputa na ubaguzi yalipungua kwa asilimia 55.2 kulinganisha na matukio 453 yaliyoripotiwa mwaka 2024.
Hata hivyo, mbali na kupungua kwa matukio takwimu zikionyesha kuwa wanaume ndio wanaongoza kwa kuwa wahanga wakubwa wa vitendo hivyo ikilinganishwa na wanawake.
Kati ya matukio yote 213 yaliyorekodiwa, wanaume walikuwa wahanga katika matukio 161, sawa na asilimia 75.6, huku wanawake wakiwa wahanga katika matukio 52, sawa na asilimia 24.4.
Elimu sababu matukio kushuka
Pamoja na hatua thabiti zinazochukuliwa na vyombo vya usalama dhidi ya watu wanaokiuka sheria ya makosa ya mtandaoni, ripoti hiyo inabainisha kuwa moja ya sababu zilizochangia kushuka kwa matukio hayo ni ongezeko la kampeni za elimu kuhusu matumizi salama ya mitandao.
