Serikali kuanzisha usafiri maalum kwa wanafunzi kupitia mwendokasi, Treni
Share
Tweet
Copy Link
- Usafiri huo unatajiwa kupunguza adha ya wanafunzi kuchelewa kurudi majumbani mwao.
Dar es Salaam. Serikali ya Tanzania imetangaza mpango mkakati wa kutenga mabasi ya wendokasi pamoja na mabehewa maalum ya treni kwa ajili ya kusafirisha wanafunzi katika maeneo ya mijini, hatua inayotajwa kupunguza changamoto za usafiri kwa wanafunzi hao.
Waziri wa Uchukuzi, Profesa Makame Mbarawa aliyekuwa akizungumza na vyombo vya habari jijini Dodoma leo Februari 4, 2026 amesema Serikali imechukua hatua hizo baada ya kusikiliza malalamiko ya wanafunzi kuhusu changamoto wanazokumbana nazo, ikiwemo kukataliwa kulipia nauli yao ya Sh200.
“Katika kuboresha usafiri wa wanafunzi mijini Serikali imeweka mipango na mikakati mbalimbali ikiwemo…kuanzisha huduma za mabasi maalum kwa ajili ya wanafunzi hususan katika nyakati za asubuhi na jioni ili kuhakikisha wanafunzi wanafika shule na kurejea majumbani kwao salama na kwa wakati,” amesema Prof Mbarawa.
Kwa miaka mingi wanafunzi hususani wa maeneo ya mijini kama jijini Dar es Salaam wamekuwa wakiteseka kupata huduma za usafiri hali inayowafanya aidha wachelewe kufika shuleni ama kufika nyumbani wakati wa kurudi.
Mbali na changamoto hizo, wanafunzi hao hulazimika kutumia muda mwingi barabarani au kutumia gharama kubwa kufika eneo la shuleni na wakati mwingine hujikuta katika hatari kubwa za kiusalama.
Aidha, Waziri Mbarawa ameielekeza Mamlaka ya Udhibiti Usafiri Ardhini (Latra), kupitia Mkurugenzi wake, Dk Habibu Suluo, kuimarisha udhibiti kwa madereva na makondakta na kuchukua hatua kali kwa watakaokiuka sheria.
Wizara pia imetoa wito kwa wananchi kuendelea kushirikiana na Serikali kwa kutoa taarifa na ushahidi wa vitendo vinavyokiuka sheria za usafiri wa ardhini kupitia namba za bure zilizowekwa ubavuni mwa kila daladala.
