Mfumuko wa bei za bidhaa, huduma wapaa Tanzania

February 9, 2023 1:56 pm · Daniel Samson

Copy Link

Umeongezeka hadi asilimia 4.9 mwaka ulioishia Januari 2023 kutoka asilimia 4.8 kwa mwaka ulioishia Disemba 2022.

Dar es Salaam. Kasi ya mfumuko wa bei muhimu za bidhaa na huduma kwa mwaka ulioishia Januari 2023 umeongezeka hadi asilimia 4.9 kutoka asilimia 4.8 kwa mwaka ulioishia Disemba 2022.

Ofisi ya Taifa ya Takwimu (NBS) katika taarifa yake iliyotolewa leo Februari 9, 2023 imesema kuongezeka kwa mfumuko kwa mwaka ulioishia Januari 2023 kumechangiwa na kuongezeka kwa mfumuko wa bei kwa baadhi ya bidhaa za vyakula na bidhaa zisizo za vyakula.

Baadhi ya bidhaa za vyakula ambazo mfumuko wake wa bei umeongezeka ni ngano kutoka asilimia 6 hadi asilimia 7.7, unga wa mtama (kutoka asilimia 1 hadi asilimia 3.9), samaki (kutoka asilimia 4.2 hadi asilimia 4.3) na matunda kutoka asilimia 1.9 hadi asilimia 5.5.

Bei ya mbogamboga imeongezeka kutoka asilimia 3.6 hadi asilimia 5.2, viazi vitamu (kutoka asilimia 3.9 hadi asilimia 5.3), choroko (kutoka asilimia 1.3 hadi asilimia 5.6) na kunde kutoka asilimia 8.7 hadi asilimia 13.9.

Zinazohusiana

Mfumuko wa bei wang’ang’ania kiwango cha Januari

Baadhi ya bidhaa zisizo za vyakula zilizoonyesha kuongezeka kwa mfumuko wa bei kwa mwaka ulioishia Januari 2023 ikilinganishwa na mwaka ulioishia Disemba 2022 ni pamoja na nguo za wanawake kutoka asilimia 2.6 hadi asilimia 2.7, viatu vya wanawake (kutoka asilimia 3.4 hadi asilimia 3.5) na vifaa muhimu kwa matumizi ya nyumbani kutoka asilimia 2.2 hadi asilimia 3.5.

Dizeli imeongezeka kutoka asilimia 27.4 hadi asilimia 33.1, petroli (kutoka asilimia 3.7 hadi asilimia 4.7), ada za shule (kutoka asilimia 0.7 hadi asilimia 2.9) na huduma ya malazi kwenye hoteli na nyumba za kulala wageni kutoka asilimia 0.9 hadi asilimia 3.8.

“Mfumuko wa bei wa bidhaa za vyakula na vinywaji baridi kwa mwaka ulioishia mwezi Januari 2023 umeongezeka hadi asilimia 9.9 kutoka asilimia 9.7 kwa mwaka ulioishia Disemba 2022,” imeeleza NBS katika taarifa hiyo.

Mfumuko wa Bei ambao haujumuishi bidhaa za vyakula na vinywaji baridi kwa umeongezeka kidogo hadi asilimia 3 kutoka asilimia 2.9.