Majaliwa awataka vijana kujitokeza kwa wingi uboreshaji wa Daftari la Wapiga Kura

July 18, 2019 12:02 pm · Mwandishi

Copy Link

Waziri Mkuu, Kassim Majaliwa akibonyeza kitufe, wakati akizindua zoezi la uboreshaji wa daftari la kudumu la wapiga kura, katika viwanja vya Mandela mkoani Kilimanjaro Julai 18.2019. Picha|Ofisi ya Waziri Mkuu.

Uzinduzi huo umefanyika kwenye uwanja wa Mandela, Manispaa ya Moshi, mkoani Kilimanjaro.
Vijana waliotimiza miaka 18 watakiwa kujitokeza kwa wingi kujiandikisha ili kutimiza haki yao ya kuwachagua viongozi wanaowataka.
NEC yaongeza vituo vya uandikishaji kutoka 36,549 vilivyotumika mwaka 2015 hadi kufikia 37,407.

Dar es Salaam. Waziri Mkuu, Kassim Majaliwa amezindua rasmi zoezi la uboreshaji wa Daftari la Kudumu la Wapiga Kura na kuwahimiza vijana waliotimiza miaka 18 wajitokeze kwa wingi kujiandikisha ili kutimiza haki yao ya kuwachagua viongozi wanaowataka katika Uchaguzi Mkuu wa mwaka 2020.

Waziri Mkuu amezindua zoezi la uboreshaji wa Daftari la Kudumu la Wapiga Kura lililofanyika leo (Julai 18, 2019) katika uwanja wa Mandela, Manispaa ya Moshi, mkoani Kilimanjaro.

Majaliwa ambaye amewasili mkoani Kilimanjaro leo asubuhi kwa ziara ya kikazi za siku nne, ametumia fursa hiyo kuwasisitiza vijana na wale wanaorekebisha taarifa zao kwamba hakuna mtu atakayeruhusiwa kupiga kura katika Uchaguzi Mkuu wa mwaka 2020 kama hajajiandikisha katika Daftari la Kudumu la Wapiga Kura ama hana kadi ya mpiga kura.

“Nitoe rai kwa vijana wote wa Kitanzania waliotimiza umri wa miaka 18 au wale ambao watatimiza umri huo ifikapo Oktoba, 2020 wajitokeze kwa wingi na kujiandikisha katika Daftari la Kudumu la Wapiga Kura. Hawa ndio walengwa wakuu kwa sababu wanaingia kwa mara ya kwanza katika uchaguzi.

“Ikumbukwe kwamba, bila kujiandikisha hawataweza kutumia haki yao ya msingi ya kuchagua viongozi wanaowataka. Hivyo, kujiandikisha kwao kutawahakikishia ushiriki wao katika uchaguzi wa viongozi,” amesema Waziri Mkuu.

Zoezi hilo ambalo limeanza leo, linafanyika kwa mara ya kwanza tangu kumalizika kwa uchaguzi mkuu wa mwaka 2015 ambapo llitafanyika nchi nzima na linatarajiwa kukamilika Machi, 2020.

Waziri Mkuu Kassim Majaliwa, akiwahutubia wananchi waliyohudhuria katika uzinduzi wa daftari la kudumu la wapiga kura, uliyofanyika kwenye viwanja vya Mandela mkoani Kilimanjaro Julai 18.2019. Picha|Ofisi ya Waziri Mkuu).

Amesema watakaohusika awamu hii ni wapiga kura waliotimiza miaka 18 hivi karibuni, wale watakaotimiza miaka 18 wakati wa Uchaguzi Mkuu Oktoba 2020, waliohama kata au jimbo na kuhamia maeneo mengine ya kiuchaguzi.

Wengine ni waliopoteza kadi au kadi zao kuharibika, wanaohitaji kurekebisha taarifa zao mfano majina ambayo hapo awali yalikuwa yamekosewa sambamba na kuwaondoa wapiga kura waliopoteza sifa kama vile kufariki.

Katika hatua nyingine, Waziri Mkuu ameziasa asasi za kiraia ambazo zimepewa vibali vya kutoa elimu ya mpigakura, zijiepushe na ushabiki wa kisiasa na badala yake zizingatie mwongozo wa elimu ya mpigakura uliotolewa na Tume ya Taifa ya Uchaguzi (NEC).

“Nimeambiwa, Tume imetoa vibali vya kutoa elimu ya mpigakura kwa baadhi ya Asasi za Kiraia. Rai yangu kwa asasi zilizopata vibali hivyo ni kuendelea kutoa elimu hiyo kwa wananchi kwa kuzingatia mwongozo wa uliotolewa na Tume ya Taifa ya Uchaguzi. Niendelee kuwaasa pia kutohusisha ushabiki na mijadala ya kisiasa muda wote mtakapokuwa mkitoa elimu hiyo,” amesema.

Amesema ana imani kuwa wananchi wakipata elimu kuhusu uboreshaji kama inavyoendelea kutolewa, basi watahamasika kutumia haki yao ya kikatiba ya kujiandikisha katika daftari hilo na hatimaye kushiriki katika Uchaguzi Mkuu wa mwaka 2020.

Soma zaidi:

Mapema, akitoa maelezo kuhusu zoezi hilo, Mwenyekiti wa NEC, Jaji Semistocles Kaijage, amesema katika zoezi la sasa, Tume itaendelea kutumia Usajili wa wapiga kura kwa njia ya elektroniki, (Biometric Voter Registration (BVR)) na imeandaa BVR 3,000.

Amesema kwa Tanzania Bara, Tume hiyo imeongeza vituo vya uandikishaji kutoka 36,549 vilivyotumika mwaka 2015 hadi kufikia 37,407; kutokana na zoezi la uhakiki wa vituo vya kuandikisha wapiga kura lililoendeshwa mwaka jana.

“Kutokana na hilo, vituo 6,208 vilibadilishwa majina, vituo 817 vimehamishwa kutoka mtaa mmoja au kijiji kimoja na kwenda kingine na vituo 19 vilihamishwa kutoka kata moja kwenda kata nyingine.

“Kwa upande wa Zanzibar, vituo vya uandikishaji vimeongezeka kutoka 380 na kufikia 407. Kwa sasa kila kijiji au mtaa, utakuwa na kituo kimoja,” amesema.

Amesema vituo vya uandikishaji vitafunguliwa saa 2:00 asubuhi hadi saa 12: jioni na zoezi la uboreshaji litafanyika kwa siku saba kwa kila kituo cha kujiandikisha iwe ni Tanzania Bara au Zanzibar.