China haitafungua kituo cha polisi Tanzania
Share
Tweet
Copy Link
- Balozi abainisha hakuna mkataba wa ushirikiano wa kipolisi kati ya China na Tanzania.
- Afafanua ni lazima kuwe na makubaliano maalumu yenye malengo mahususi.
Dar es salaam. Watanzania wametakiwa kupuuzia taarifa iliyotolewa na idhaa ya kiswahili ya Shirika la Utangazaji la Uingereza (BBC) kuwa nchi ya China ina mpango wa kufungua kituo cha polisi barani Afrika ikiwemo Tanzania.
Balozi wa Tanzania nchini China, Mbelwa Kairuki amekanusha madai hayo kwa kueleza kuwa taarifa hiyo iliyonukuliwa kutoka baadhi ya vyombo vya habari nchini Nigeria siyo ya kweli bali ina lengo la kuleta sintofahamu.
“Niwahakikishie hizi ni habari za uongo. Sisi kama Tanzania hatuna mkataba wowote wa mahusiano ya ushirikiano wa kipolisi ambao unapelekea kufungua vituo vya polisi kama ilivyodaiwa, hatujaomba wala wao hawajatuomba,” amesema Kairuki.
Balozi Kairuki amesisitiza kuwa ni kweli upo utaratibu wa nchi moja kufungua kituo cha polisi kwenye taifa lingile lakini lazima kuwe na makubaliano maalum baina ya mataifa hayo kwa madhumuni mahususi.
“China ina makubaliano na nchi ya Italia ya polisi wake kufanya kazi katika nchi hiyo na dhumuni lake lilikuwa kukidhi mahitaji ya maelfu ya watalii wa China waliokuwa wanaenda kutalii katika jiji la Milan,” amesema.
Aidha Kairuki amesikitishwa na kitendo cha BBC kutumia vyanzo visivyo vya kuaminika kuandika habari zake jambo ambalo linashusha heshima ya shirika hilo kongwe duniani.
Taarifa iliyochapishwa katika tovuti ya BBC na ukurasa wa mtandao wa Twitter siku ya jumanne Oktoba 18 mwaka huu ilieleza China imekuja na mpango huo ili kudhibiti vitendo vya kihalifu vinavyofanywa na raia wake katika nchi za Tanzania, Nigeria na Lesotho.
