Senegal yaufungia mtandao wa TikTok kwa madai ya kuchochea ghasia
Share
Tweet
Copy Link
- Yasema matumizi yake yanatishia usalama wa nchi
- Yaungana na mataifa ya Ulaya pamoja na America ambayo mtandao huo umepigwa marufuku.
Dar es Salaam. Senegal imezuia matumizi ya programu ya mtandao wa kijamii wa TikTok kutokana na madai ya kueneza jumbe za chuki na uasi baada ya kufungiwa kwa chama kikuu cha upinzani na kumweka kizuizini kiongozi wake Ousmane Sonko.
Senegal imekua nchi ya kwanza barani Afrika kuzuia matumizi ya mtandao huo wa kijamii, ambapo zuio hilo linakuja baada ya kufungwa pia kwa huduma za intaneti siku ya jumatatu Julai 31, 2023.
Waziri wa Mawasiliano na Uchumi wa Dijitali wa Senegal, Moussa Bocar Thiam amebainisha kuwa wameufungia mtandao huo maarufu duniani baada ya kubaini kuwa matumizi yake yanatishia usalama wa nchi.
“Imebainika kuwa programu TikTok ni mtandao wa kijamii unaopendelewa na watu wenye nia mbaya kusambaza jumbe za chuki na uharibifu zinazotishia utulivu wa nchi,” amesema Thiam.
Senegal inaungana na baadhi ya taasisi na mataifa ya Ulaya Na Marekani ambayo yameupiga marufku mtandao huo ikiwemo tume ya Umoja wa Ulaya (EU), Marekani yenyewe pamoja na Canada.
Soma zaidi
Tangu kuanzishwa kwake mwaka 2017, TikTok umegeuka kuwa mtandao pendwa hususan na vijana ambao wamekuwa wakibuni maudhui mbalimbali kwa njia ya video ambapo hutumia kama njia mojawapo ya kujipatia kipato na burudani.
Kupitia mtandao huo watu kadhaa wamejizolea umaarufu nchini Tanzania kutokana na aina ya maudhui wanayochapisha akiwemo Mtanzania Killy Paul ambaye alipata fursa ya kwenda kutumbuiza kwenye tamasha la muziki nchini India kupitia mtandao huo.
Kwa mujibu wa Shirika la Utangazaji la Uingereza (BBC), mtandao wa Tiktok mwaka 2021 ulipiku watumiaji mtandao wa Google jambo ambalo halikuwahi kufanyika kwa miaka 10 iliyiopita.
Mpaka sasa mtandao huo umepakuliwa na watu zaidi ya bilioni 1 duniani kote na kuufanya kuwa mtandao uliopakuliwa zaidi ukifuatiwa na mtandao wa Instagram na Facebook.
Kwa mujibu wa Ripoti ya Takwimu ya robo ya pili ya mwaka (Aprili-Juni)ya Mamlaka ya Mawasiliano Tanzania (TCRA) Tiktok ilishika nafasi ya tatu katika orodha ya mitandao iliyotumiwa zaidi nchini ikiwa na jumla ya gigabaiti milioni 33.3.
