• Hiyo ni sawa na kusema mauzo ya parachichi nje ya nchi yameongezeka zaidi ya mara mbili  ndani ya kipindi cha takribani miaka sita.

---

Dar es Salaam. Msimu wa zao la parachichi kwa mwaka 2025/2026 umeanza kwa kicheko kwa wakulima, baada ya mauzo ya zao hilo kupaa kwa asilimia 236.9 ndani ya kipindi cha miaka sita, suala linalotoa muelekeo chanya wa sekta hiyo nchini.

Waziri wa Kilimo Daniel Chongolo, aliyekuwa akifungua mkutano wa tatu wa kitaifa wa wadau wa tasnia ya parachichi uliofanyika Dodoma amesema uzalishaji uliofanyika katika msimu wa 2025/2026 umevuka lengo la mwaka.

“Tanzania iliuza nje tani 52,000 za parachichi, kiasi kilichovuka lengo la tani 40,000 lililowekwa na kutarajiwa kufikiwa ifikapo mwaka 2030,” amesema Chongolo Oktoba 7, 2026.

Mwaka 2020/2021, Tanzania iliuza nje tani 15,432.77 za parachichi, kabla ya kiasi hicho kuongezeka hadi tani 52,000 mwaka 2025/2026.

Hiyo ni sawa na kusema mauzo ya parachichi nje ya nchi yameongezeka zaidi ya mara mbili  ndani ya kipindi cha takribani miaka sita, hali inayoashiria kuimarika kwa nafasi ya Tanzania katika soko la kimataifa la zao hilo.

Parachichi yapaisha fedha za kigeni

Kwa mujibu wa Chongolo mauzo ya tani 52,000 mwaka 2025/2026 yameingiza Dola za Marekani milioni 97.2 sawa na Sh259.5 bilioni ulikinganisha Dola za Marekani milioni 44.2 ambayo ni sawa na Sh118 bilioni kwa viwango vya sasa katika msimu wa mwaka 2020/2021.

Kwa mujibu wa takwimu hizo, mapato hayo yameongezeka kwa asilimia 120.4 ndani ya kipindi cha miaka sita.

Hii inaonyesha kuwa ukuaji wa tasnia ya parachichi hauishii katika kuongeza kiwango cha zao linalofika masoko ya nje, bali pia unaongeza mchango wake katika upatikanaji wa fedha za kigeni nchini.

Sababu zatajwa

Akizungumzia sababu za ukuaji huo, Waziri Chongolo amesema mafanikio hayo yamechangiwa kwa kiasi kikubwa na ushirikiano kati ya Serikali na sekta binafsi katika kuimarisha tasnia ya parachichi.

Alisema hatua hizo zimehusisha kuboresha miundombinu, kuimarisha mifumo ya masoko na kuweka mifumo rasmi, yenye uwazi na ufanisi katika mnyororo mzima wa thamani wa zao hilo.

Hata hivyo, kuvuka lengo la tani 40,000 lililowekwa kwa mwaka 2030 kunaiweka Tanzania katika hatua nyingine ya safari yake ya kutoka kuongeza kiasi cha parachichi kinachozalishwa hadi kuhakikisha wakulima na wadau wengine wananufaika zaidi na soko hilo linalokua.