• Ni biashara ya vitafunwa kama vitumbua pamoja na chapati.
• Kabla ya kuanzisha biashara hizi ni muhimu kujua aina ya wateja unaotarajia kuwaauzia.

Dar es Salaam. Ukosefu wa ajira ni changamoto kubwa inayowakumba watu wengi, hasa vijana, katika jamii nyingi za Afrika, ikiwemo Tanzania. 

Wakati idadi ya wahitimu wa shule na vyuo inaongezeka kila mwaka, nafasi za ajira zinabaki kuwa chache, na hivyo kuongeza shinikizo kwa watu kutafuta njia mbadala za kujipatia kipato. 

Aidha, mtaji ni changamoto nyingine kubwa. Watu wengi wanapojaribu kuanzisha biashara, wanakutana na ugumu wa kupata fedha za kuanzisha miradi yao. 

Hata hivyo, je, unajua kuwa kwa Sh50,000 unaweza kuanzisha biashara yako mwenyewe? 

Ni fedha kidogo, lakini kwa ubunifu na usimamizi mzuri, unaweza kuanzisha biashara ndogo yenye uwezo wa kukua na kuleta faida. 

Biashara kama vile kuuza bidhaa za mitumba, kutoa huduma za usafi, au kuanzisha biashara ya chakula cha mitaani zinaweza kuanzishwa kwa mtaji huu mdogo, na kuwa chanzo cha ajira na kipato kwa mtu mmoja au hata familia nzima.

Katika makala hii, tutajadili fursa za kibiashara zinazoweza kuanzishwa kwa mtaji wa Sh 50,000, na jinsi gani unaweza kufanikiwa.

Biashara ya vitumbua

Vitumbua ni moja ya vyakula maarufu na vinavyohitajika sana katika maeneo ya biashara na mitaa ya miji mikubwa. 

Hii ni biashara rahisi kuanzisha na inahitaji mtaji mdogo, huku wateja wengi wakiwa na hamu ya vitumbua. 

Ili kuanzisha biashara hii, unahitaji vifaa kama kikango cha Sh15,000 unaweza kuwatembelea wachonga majiko mara nyingi huwa navyo, jiko la mkaa kwa Sh5,000 kuanzia ila mtaji ukikuwa hamia kwenye nishati safi.

Mahitaji mengine ni mafuta lita 1 kwa Sh5,600, mchele kilo 2 kwa Sh3,800, hiliki Sh500, sukari  kilo moja, kwa Sh3,000, mkaa Sh3,000, kindoo cha kuuzia Sh5000, na kibeseni cha kumulia Sh3,000, vifungashio Sh1,200 akiba Sh4900.

Akiba unayoiweka hutumika pale unapopata dharura inayohitaji pesa ya haraka.

Jumla ya gharama za kuanzisha biashara hii ni Sh50,000 ingawa unaweza kuanza na sehemu ya mtaji wako na kuongeza mapato kadri biashara inavyokua.

Biashara ya viatu vya kike vya mtumba

Biashara ya viatu vya mtumba ni maarufu sana kwa sababu ya bei yake nafuu na ubora wa viatu vinavyouzwa

Unaweza kununua viatu vya mtumba vya bei nafuu kutoka kwa wauzaji wa jumla na kuvifanyia marekebisho kama vile kusafisha, kung’arisha, au hata kubadilisha rangi kisha kuviuza kwa faida.

Hii ni biashara nzuri hasa kwa sababu viatu ni bidhaa muhimu ambayo watu wanahitaji kila siku. 

Pia, unaweza kuuza viatu vya watoto, wanawake na wanaume ili kufikia wateja wa aina zote.

Ili kuanzisha biashara hii, unahitaji kununua viatu 12 kwa bei ya Sh40,000 (Sh3,000 kwa kila pair), na pia gharama za nauli Sh5,000 na matumizi mengine kama chakula Sh2,000, akiba Sh3,000 hii utaitumia iwapo utahitaji kulipia eneo la kuuzia biashara yako kama ushuru.

Kwa jumla, utahitaji Sh50,000 kuanzisha biashara hii. Biashara hii ni rahisi na inahitaji mtaji mdogo, lakini ikiwa utaifanya kwa ustadi, inaweza kutoa faida nzuri.

Biashara ya kashata

Kashata ni kitafunwa kitamu kinachozalishwa kwa urahisi na kinachopendwa na wengi, hasa maeneo ya biashara na shule. 

Biashara ya kashata ni rahisi kuanzisha na inahitaji vifaa kidogo. Ili kuanzisha biashara hii, unahitaji sufuria kwa Sh3,500, sukari kilo mbili Sh6,000, karanga kilo 3 kwa Sh13,200, na kisu kwa Sh1,000. 

Akiba ya pembeni utaweka Sh26,300, pesa hii utaitumia baada ya kupata wateja ambao utawauzia kwa bei ya jumla ili na wao wakauze katika maeneo yao ya biashara.

Hivyo, katika uhitaji wa mtaji wetu biashara hii inaweza kufanyika bila kuyumba na ili upate wateja wengi hakikisha unatembelea maeneo ya vijiweni na maeneo ya nyumba za ibada kama msikitini wakati wa jioni.

ingawa kashata inahitaji mtaji mdogo, lakini kutokana na umaarufu wake, unaweza kupata wateja wengi na kufanikiwa kwa haraka.

Biashara ya chapati

Chapati ni chakula kinachohitajika sana kwa familia nyingi, hasa kwenye maeneo ya biashara na miji mikubwa. 

Hii ni biashara rahisi kuanzisha kwa sababu mahitaji yake ni madogo na zinauzika kwa haraka.

Ili kuanzisha biashara ya chapati, unahitaji vifaa kama kibao cha kupikia Sh6,000, ‘hot pot’ Sh10,000, mafuta lita 1 kwa Sh5,600, chumvi Sh1,000, ngano kilo 4 kwa Sh7,200, na siagi nusu kilo kwa Sh3,000. 

Mahitaji mengine ni pamoja na jiko, kwa kua ni mwanzo unajitafuta unaweza kutumia jiko la mkaa ambalo gharama yake ni Sh5,000, utahitaji kibakuli Sh500, kijiko cha kuchotea mafuta na cha kushikia chapati Sh2,500 pamoja na mkaa wa Sh3,000.

Akiba katika biashara hii itakuwa 6200 baada ya kununua mahitaji yako yote hii utaitumia iwapo utapata dharura ingawa ipo ndani ya mtaji wako.

Biashara ya chapati ina faida kubwa kwa sababu inahitajika kila wakati, hasa kwenye maeneo yenye watu wengi, hivyo ni vyema mtu kuamka mapema ili kutengeneza kitafunwa hiki.

Uuzaji wa nguo za mtumba

Nguo za mtumba zinaweza kununuliwa kwa bei nafuu na kuuza kwa faida. Unaweza kuanza biashara hii kwa mtaji huu na baadae ukajikuta umekuwa mfanyabiashara mkubwa

Unaweza kununua nguo za mtumba kwa bei nafuu kutoka kwa wauzaji wa jumla na kuziuza kwa faida.

 Hii ni biashara nzuri hasa kwa sababu nguo za mtumba ni maarufu sana na watu wengi wanapenda kuzivaa kwa sababu ya unafuu wa bei na upatikanaje wake. 

Katika biashara hii utahitaji nauli ya kufuata nguo katika masoko mbalimbali, mathalani kwa wakazi wa Dar es Salaam, wanaweza kutembelea soko la Ilala au Karume kila siku asubuhi.

Ikiwa unataka kuuza nguo za kinadada unaweza kufungulisha brause za Sh3,000 kwa kila mmoja, ukachukua shati 14 ambazo ni nzuri na zinazovalika hata maeneo ya kazini.

Nguo hizi jumla zitakugharimu Sh42,000 na akiba itabaki Sh8,000 ambayo utaitumia kwa ajili ya nauli, ukiona pia akiba ni ndogo unaweza kupunguza idadi ya nguo ili ubaki na akiba.

Kitu cha msingi hakikisha mapato na matumizi hayazidiani.

Unaweza pia kuuza viatu vya mtumba, mikoba, na vifaa vingine vya mavazi ili kuvutia wateja wengi zaidi.

Kwa ubunifu, uvumilivu, na usimamizi mzuri wa rasilimali, biashara ndogo ndogo zinaweza kuwa suluhisho la kudumu kwa watu wengi wanaokutana na changamoto ua ukosefu wa ajira.

Mtaji wa Sh 50,000 unaweza kuwa hatua ya kwanza katika safari ya ujasiriamali, ambapo mtu anaweza kuanzisha biashara, kujitegemea, na kutoa ajira kwa wengine.