• Apple iPhone 15 Pro Max ndiyo simu janja iliyouzwa zaidi duniani mwaka 2025, ikiwa imepata mauzo ya takribani nakala milioni 38.2.

---

Dar es Salaam. Simu za mkononi zimeendelea kuwa nyenzo muhimu ya mawasiliano ikisaidia kuwaunganisha watu kutoka pande mbalimbali za dunia.

Mbali na shughuli kuu ya mawasiliano kifaa hicho kinachozidi kuongezewa ubora mwaka hadi mwaka kinasaidia kurahisha majukumu mbalimbali ikiwemo ya kazi kupitia huduma ya intaneti.

Mamlaka ya Mawasiliano Tanzania (TCRA)  inabainisha kuwa hadi kufikia Septemba mwaka huu kulikuwa na simu janja milioni 27 kutoka milioni 22 Septemba 2024.

Licha ya ongezeko la simu hizo, zipo zenye ubora na mionekano mbalimbali zinazovutia zaidi wanunuaji kutoka maeneo yote duniani yanayotumia kifaa hicho.

Kwa mujibu wa ripoti zilizotolewa na Global Smartphone Shipment, Market data, trends & insights, ifuatayo ni oroddha ya simu janja zilizouzwa zaidi kwa mwaka 2025.

iPhone 15 Pro Max

iPhone 15 Pro Max, ni miongoni mwa simu iliyonunuliwa zaidi kwa mwaka huu 2025, ikiwa imepata mauzo ya takribani nakala milioni 38.2.

Simu hiyo, iliyotengenezwa na kampuni ya teknolojia ya Marekani, Apple ilizinduliwa rasmi mwaka Septemba 12, 2023 na kusambaa maeneo mbalimbali duniani ikiwemo Tanzania.

Miongoni mwa sifa kuu zillizovutia wanunuaji kwa mwaka huu tofauti na matoleo ya miaka iliyopita ni muundo wa kisasa, kamera kali, uwezo mkubwa wa kuhifadhi taarifa pamoja n akuchakata mambo kwa haraka.

Sifa nyingine zinazoipamba simu hiyo ni chipu yake ya A17 Pro, inayowezesha kasi kubwa ya utendaji hasa kwa shughuli nzito kama uhariri wa video, michezo ya kisasa na programu nyingine za kitaalamu pamoja na uwezo mkubwa wa kutunza chaji.

Samsung Galaxy S24 Ultra

Samsung Galaxy S24 Ultra imeendelea kuvutia soko la simu kwa mwaka 2025, ikiwa imepata mauzo ya takribani nakala milioni 30.5 duniani kote. 

Simu hii ya Android, kutoka kwa kampuni ya teknolojia ya Samsung iliyopo Korea Kusini, imepata umaarufu kutokana na ubora wa kamera zake, uwezo wa betri na skrini yenye ubora wa juu ya Dynamic AMOLED yenye rangi angavu na uzito mdogo. 

Apple iPhone 15

Apple iPhone 15 imeendelea kuvutia watumiaji duniani kote mwaka 2025, huku ikishikilia nafasi ya tatu katika orodha ya simu zilizouzwa zaidi kwa takribani nakala milioni 27.8. 

Tofauti na iPhone 15 Pro Max, simu hii imependwa zaidi na wanunuaji wanaopenda simu zeye ubora kwa gharama nafuu kidogo .

Pamoja n abei yake kuwa mserereko kidogo iPhone 15 inapendwa zaidi kutokana na muundo wake wakuvutia, utendaji na urahisi wa  unaowezeshwa na chipu yenye nguvu bila kusahau uwezo wa juu wa kamera.

Katika soko lenye ushindani mkali kati ya watengenezaji wa simu, iPhone 15 imeweza kushindana vikali na simu zingine za Android, ikionyesha kwamba licha ya gharama yake kuwa juu zaidi ikilinganishwa na baadhi ya simu za Android, wateja bado wanatilia mkazo thamani ya uzoefu na kuaminika kwa bidhaa ya Apple.

Xiaomi Redmi Note 13 Pro

Xiaomi Redmi Note 13 Pro imeibuka kati ya simu zinazopendwa zaidi duniani mwaka 2025, ikiwa imepata mauzo ya takribani nakala milioni 25.1. 

Simu hii imepata umaarufu katika masoko ya Asia na Afrika ambapo watumiaji wanatafuta simu zenye mchanganyiko wa vipengele vya kisasa kwa bei ya ushindani. 

Kubadilika kwa simu za daraja la kati limekuwa kiini cha mafanikio ya Redmi Note 13 Pro, ikiwa na kamera yenye uwezo mkubwa, utendaji thabiti na betri yenye uwezo mzuri kwa matumizi ya kila siku.

Redmi Note 13 Pro, ina uwezo wa kuchukua picha na video zenye ubora mzuri hata katika mazingira ya mwanga mdogo.

Aidha, ina skrini ya ubora wa juu, hutoa uzoefu mzuri wa michezo, burudani na kuvinjari mitandao mbalimbali kwa rangi angavu na mwonekano wazi. Betri yenye uwezo mzuri pia imeongeza thamani kwa watumiaji wanaotaka simu inayoweza kudumu kwa muda mrefu bila kuchaji mara kwa mara.

Hii imeifanya kuwa chaguo maarufu hasa kwa vijana na watumiaji ambao hawataki kulipa gharama kubwa kwa simu za daraja la juu, lakini wanataka ubora wa kutosha kwa matumizi bora.

Apple iPhone 15 Pro 

Apple iPhone 15 Pro imeendelea kujitokeza kama moja ya simu zinazopendwa na kuuza kwa wingi duniani mwaka 2025, ikiwa imepata mauzo ya takribani nakala milioni 23.3. 

Toleo hili la Pro limejikita katika kukidhi mahitaji ya watumiaji wanaotafuta utendaji wa hali ya juu na teknolojia ya kisasa bila gharama ya juu kama ilivyo kwa toleo la Pro Max. 

iPhone 15 Pro imepata umaarufu mkubwa kutokana na nguvu za kiutendaji, ubora wa kamera na muundo mzuri unaofanya simu hiyo kuonekana yakuvutia zaidi. 

Kama ilivyo kwa matoleo mengine ya Pro kutoka Apple, iPhone 15 Pro pia inawekwa mbele kwa uwezo wa kamera zake. Mfumo wa kamera za iPhone 15 pro unaowezesha kupiga picha na kurekodi video zenye rangi angavu na undani wa hali ya juu, hata katika mazingira ya mwanga mdogo hivyo kufanya kuwa chaguo la wazalishaji wa maudhui walio wengi.

Ingawa simu hii ina bei ya juu ikilinganishwa na simu nyingi za Android zinazoshindana sokoni, umaarufu wake unaonyesha kuwa watumiaji bado wanaendelea kuinunua kwa sababu ya uaminifu wa chapa na uzoefu wa jumla wa mtumiaji.