Rais Samia awataka wanaoishi mabondeni kuhama kuepuka maafa
Share
Tweet
Copy Link
- Asema Serikali imeshatoa maagizo ya kuwa katika hali ya utayari muda wote.
- Awataka wananchi wanaokaa maeneo hatarishi kuhama, kuepusha athari zaidi.
Dar es Salaam. Rais wa Tanzania Samia Suluhu Hassan amewataka wakazi wanaoishi maeneo hatarishi ikiwemo mabondeni na kwenye mapito ya mito kuhama mara moja ili kuepukana na athari zinazoweza kutokea kutokana na mvua kubwa zinazoendelea kunyesha maeneo mbalimbali nchini.
Kwa miezi mitatu mfululizo athari za mvua kubwa zimekuwa zikiripotiwa katika maeneo mbalimbali nchini ikiwemo mkoani Kilimanjaro, Manyara na Dar es Salaam ambapo madhara yaliyojitokeza ni pamoja na vifo, kuharibika kwa miundombinu kama barabara na madaraja na kuharibiwa kwa makazi na mali nyingine yakiwemo magari.
Hata hivyo, wakazi waishio maeneo ya mabondeni au pembezoni mwa mito hususan jijini Dar es Salaam ndio wameonekana kuathiriwa zaidi na mvua hizi zilizotabiriwa na Mamlaka ya Hali ya Hewa Tanzania (TMA).
Rais Samia aliyekuwa akizungumza katika hafla ya kumuingiza kazini Askofu Mkuu wa Kanisa la Kiinjiri la Kilutheri Tanzania KKKT, Dk. Alex Malasusa leo Januari 21, 2024 amewaambia Watanzania kuwa ni vyema wakachukua tahadhari ili “kuiepusha nchi na misiba mikubwa”.
“Tunawataka wananchi wawe na hadhari, wale wanaohisi wanaishi maeneo ya hatari, waondoke wasogee juu… hatuwezi kudhibiti kiwango cha mvua kinachonyesha.
Niombe sana wananchi tuchukue tahadhari na kuliepusha taifa na misiba mikubwa au hatari kubwa zinazotokana na mabadiliko ya tabia nchi,” amesisitiza Rais Samia.
Ndani ya siku hizi mbili baadhi ya wakazi wa Jiji la Dar es Salaam yakiwemo maeneo ya Tegeta, Kunduchi na Jangwani wamejikuta wakisaka maeneo salama ya kuishi baada ya nyumba zao kujaa maji au kusombwa na mafuriko.
Itakumbukwa kuwa hivi karibuni nyumba zaidi ya 30 ziliathirika kutokana na maporomoko ya udongo uliochanganyika na mawe yaliyoyasababishwa na mvua zinazoendelea kunyesha katika kata ya Kilomeni,Wilaya ya Mwanga mkoani Kilimanjaro.
Agosti 26, 2023 Mamlaka ya Hali ya Hewa Tanzania (TMA) ilitoa taarifa ya uwezekano wa kuwapo kwa mvua kubwa za El-Nino ambazo huenda zikasababisha vifo, magonjwa ya mlipuko na uharibifu wa miundombinu kuanzia Oktoba hadi Desemba 2023.
TMA ilisema mvua hizo zitasababisha mafuriko na maporomoko ya ardhi, upotevu wa mali na madhara kwa binadamu na mazingira.
Madhara makubwa zaidi yanayokumbukwa ni mafuriko ya matope yaliyotokea Disemba 3, 2023 wilayani Hanang, ambapo watu 89 walipoteza maisha huku wengine zaidi ya 130 wakijeruhiwa.
Latest
